José García Mosquera
José García Mosquera (Castro de Escuadro, Maceda, 1817 – Ourense, 1868) foi poeta, escritor, tradutor e profesor. Especialista en linguas clásicas, exerceu como catedrático de Latín e Humanidades e de Retórica e Poética en Ourense. Escribiu poesía en galego, castelán e latín.
A súa relación con Maceda é esencial: naceu en Castro de Escuadro, onde se atopaba a casa familiar, e os seus restos descansan no cemiterio de Santa Baia de Escuadro. O Concello de Maceda dedicoulle tamén unha rúa en recoñecemento á súa figura.
A súa obra
É especialmente recoñecido pola súa tradución ao galego do “Beatus ille” de Horacio, titulada A vida do campo, considerada unha obra pioneira da tradución dos clásicos á lingua galega e moi valorada ao longo da historia da literatura galega.
A súa produción poética foi recompilada posteriormente no volume Poesías de José García Mosquera (1948). A súa figura sitúase entre os autores que contribuíron ao renacemento literario galego do século XIX.